Ўзбекистоннинг Мустақил Республика деб эълон қилиниши халқимизнинг асрий орзуларини руёбга чиқарган ҳолда фавкулодда мураккаб вазифаларнинг мавжудлигини ҳам намоён этди. Юз ўттиз йил давом этган сўнгги истибдод собиқ Иттифоқдаги барча республикаларни жуда кўп ҳаётий зарур жабҳаларда бир-бирига тобелантириб қўйгани маълум бўлиб қолди. Айниқса, иқтисодий масалаларда бу ҳол жиддий муаммоларни келтириб чиқарганди. Айни чоғда ана шу «занжирбандлик»нинг маънавий ниқобига айлантирилган ижтимоий соҳаларда ҳам ғоят чалкаш, лекин муайян мафкурага тамомила бўйсунган қарашлар, талқин ва тушунчалар ҳукмронлиги аён бўлди.