Po'lat Mo'min she'rlarida bolalarga xos beg'uborlik bor, har satri soddalig-u samimiylikdan so'zlaydi. Sersavol bolakayning qiziquvchanligi-yu arazchi qizaloqning tabiati ham aynan Po'lat Mo'min she'rlariga jo boʻlgan. Shoir she'rlarini bola boʻlib yozganiga shubha qilmaymiz. Satrlarning ravonligi ikki bolakayning o'zaro suhbatini eslatadi. Ijodkor, asosan, insoniy fazilatlar, tabiat hodisalari, atrofimizdagi borliqning bolalarga qiziqarli jihatlarini topib qalamga oladi. She'rlarni o'qir ekanmiz, ularni yod olgimiz, sinfdosh-u tengdoshlarimizga aytib bergimiz keladi.