Jismoniy tarbiya O'zbekiston Respublikasi xalqlari milliy madaniyatining ajralmas qismi, jismoniy va ma'naviy kamolotining muhim vositasi bo'lib, respublika xalqlari o'rtasida do'stlikni mustahkamlash, ijtimoiy va iqtisodiy taraqqiyot ishiga xizmat qiladi. Mazkur o'quv qo'llanma jismoniy tarbiya va sport boʻyicha mutaxassislar tayyorlamaydigan oliy ta'lim muassasalari uchun mo'ljallangan boʻlib, O'zbekiston Respublikasi Vazirlar Mahkamasi muvofiqlashtirilgan kengashining 2003 yil 29 martdagi majlis qarori bilan tasdiqlangan DTS va namunaviy dastur asosida tuzilgan. Qo'llanmada oliy o'quv yurti bakalavriyati talabalarining jismoniy tarbiya faniga oid o'zlashtirishlari zarur bo'lgan nazariy bilimlar hamda dars vaqtida va darsdan so'ng talabalarning bo'sh vaqtlarida mustaqil shug'ullanishlari uchun amaliy maslahatlar o'z aksini topgan. Shuningdek, olimpiada o'yinlari, harakati va olimpiada falsafasi, O'zbekiston Respublikasi hududida Jismoniy tarbiya fanining tarixi va rivoj topishi, O'zbekiston sportchilarining jahon, Osiyo chempionatlari birinchiliklari va xalqaro musobaqalardagi ishtiroki to'g'risida batafsil ma'lumotlar berilgan.